ಚೆಂಡೆದ ಸದ್ದ್‌ಗ್ ಪಜ್ಜೆ ದೀವೊಂದು
ಸಿರಿಯೇಸದ ಪೊರ್ಲುನ್ ತೂವೊಂದು
ಬೊಲ್ಪು ಮಾಜಿದ್ ಕತ್ತಲೆಯಾಂಡ್
ಕತ್ತಲೆಗ್ ಪೂಪೂಜನೆದ ತುಡರ್ ಬೊಲ್ಪು ಕೊರುಂಡ್
ತುಳುನಾಡ ಮಣ್ಣ್‌ದ ಪೆರ್ಮೆದ ಆನ್‌ಕಲೆ
ಮಣ್ಣ ಪರತಿರಿನ್ ಮೆರೆಪಾಯಿ ಕಲೆ

ಸಿಂಗಾರೊಡು ಮೆರೆಪಿ ರಾಜಕುಮಾರಿ
ಗತ್ತ್‌ಡ್ ಮೆರೆಪಿನ ರಾಜಕುಮಾರೆ
ಚೆಂಡೆದ ದನಿ ಕಟೀಲ ತಲ ಮುಟ್ಟ ಕೇನ್ನಗ
ಭಕುತಿದ ಸುಗಿಪು ಕಟೀಲಪ್ಪೆಗ್ ಕೇನಂದೇ?
ಚಂಡ ಮುಂಡೆರೆನ ಅಧರ್ಮ ನಡಪಂದ್
ಆಟ ಮುಗಿಂಡಲಾ ಮೋನೆದ ರಂಗ್ ಮಾಜಂದ್!

ಕಿರೀಟಡ್ ಮೆನ್ಕುನ ಸಾರ ಕನ್ನಡಿಲು
ಆಟನೇ ತುಳುವೆರೆ ನರ-ನಾಡಿಲು
ದಿಗಿನ ತೂಯರೆ ಒಂಜಿ ಇರ್ಲ್ ಯಾವಂದ್
ಕಲಾವಿದೆರೆನ್ ಪುಗರಿಯರೆ ಪದಕುಲು ಯಾವಂದ್
ಆಟದಾಯೆ ಮೆರೆಪಿನಿ ರಂಗಸ್ಥಳೊಟ್ಟು, ಆಂಡಾ
ಆಯನ ಬಂಙದ ಬದ್‌ಕ್ ಏರೆಗ್ಲಾ ತೆರಿಯಂದ್

ಆಟ ಅಳಿಯರೆ ಬುಡಯೆರ್ ತುಳುವ ಜವನೆರ್
ಆಟ ಒರಿಪಾಯೆರೆ ತುಳುವ ಜೋಕುಲು ತಯಾರಾಪೆರ್
ಯಕ್ಷಗಾನದ ಕಲೆ ತುಳುನಾಡ ಪಿದಯಿಲಾ ತೆರಿಯೊಡು
ಪೆರಿಯಕಲ್ನ ಈ ಪರಪೋಕು ಪರವೂರುಡ್ಲಾ ಮೆನ್ಕೊಡು
ಆಟನ್ ತೆರಿಯರೆ ಯಾವಂದ್ ಪತ್ತ್ ಪಜ್ಜೆ
ಆಟಗ್ ಚುಕ್ಕಿ ದೀವರೆ ಬರೊಡಾಂಡ್ ಪತ್ತನಾಜೆ

PC:AT